బాలయ్య స్టైలే సెపరేట్. హిందూపురం ఎమ్మెల్యే అభ్యర్థిగా పోటీ చేస్తున్న నందమూరి నట సింహం ప్రచారం ప్రారంభించారు. నియోజకవర్గం వ్యాప్తంగా రోడ్ షో చేస్తున్నారు. ఈ క్రమంలో అభిమానులు కొందరు ఆయనకు మంచినీళ్ల బాటిల్ అందించారు. దాన్నలా అందుకుని గటగటా నీళ్లు తాగి మూతపెట్టి ఆ బాటిల్ ను పైకి ఎగరేసి చేత్తో పట్టుకుని తిరిగి అంతే స్పీడుతో విసిరేసారు. ఆ తర్వాత తెలుగుదేశం కండువాను అందుకుని వాహనంపైనున్న నాయకుడి మెడలో వేసారు. తదుపరి ప్రసంగం మొదలుపెట్టారు.
జగన్ ప్రభుత్వం చేసిన అభివృద్ధి శూన్యమన్నారు. గులకరాయి నాటకాలతో ఓట్లు వేయించుకోవాలని యాక్ట్ చేస్తున్నారంటూ విమర్శనాస్త్రాలు సంధించారు. సంక్షేమం అంటే తెలుగుదేశం ప్రభుత్వం అని గుర్తు చేసారు. దేశంలో ఎవ్వరూ చేపట్టని కిలో 2 రూపాయల పథకం ఆనాడు ఎన్టీఆర్ ప్రవేశపెట్టారనీ, ఇప్పుడు చంద్రబాబు నాయుడుగారు వృద్ధులకు ఫించన్లు, డ్వాక్రా సంఘాలు, అన్న క్యాంటీన్లు... యువత కలలు సాకారం చేసేందుకు ఐటీ పరిశ్రమలు.. ఇలా ఆంధ్రప్రదేశ్ రాష్ట్రాన్ని అభివృద్ధి పథంలో నడిపించారన్నారు.
ఇప్పుడు జగన్ ఏపీకి వున్న బ్రాండ్ ఇమేజ్ ను డ్యామేజ్ చేసారనీ, రాష్ట్రాన్ని అప్పులుకుప్పగా మార్చారంటూ మండిపడ్డారు. ఏపీ రాజధాని ఎక్కడ అంటే ప్రతి ఆంధ్రుడు ఎక్కడ అని చెప్పాలో తెలియని అయోమయ స్థితి కల్పించాడని విమర్శించారు. అందుకే మీ ఓటుతో జగన్ మోహన్ రెడ్డి ప్రభుత్వాన్ని కూకటివేళ్లతో పెకలించాలని పిలుపునిచ్చారు.
