విద్య పేరుతోనో, ఉద్యోగం పేరుతోనో ఇప్పుడు బయటి ఊరిలో ఒంటరిగా రూముల్లో లేదా హాస్టల్‌లలో ఉండే యువత ఎక్కువగా ఉన్నారు. తల్లిదండ్రులు ఏదైనా పని మీద వస్తున్నారంటే ఇక వారు పడే ఆందోళన అంతా ఇంతా కాదు. కొందరు కుంటిసాకులు చెప్పి రాకుండా చేస్తే, మరికొందరు తగిన ఏర్పాట్లతో తప్పించుకుంటారు. కానీ ఫ్రాన్స్‌లో ఒక కుర్రాడు చేసిన పని తెలిస్తే ముక్కున వేలేసుకుంటారు.
జనవరి 18న ఫ్రాన్స్‌లో లియోన్ నుంచి రెన్నెస్‌కు వస్తున్న EZY4319 విమానంలో బాంబు ఉన్నట్లు బెదిరింపు కాల్ వచ్చింది. దీంతో ఆ విమానాన్ని తిరిగి లియోన్ విమానాశ్రయంలోనే ల్యాండ్ చేసి, తనిఖీలు చేసారు. కాగా విమానంలో ఎలాంటి బాంబు లేదని నిర్ధారించుకున్న సిబ్బంది కాల్ ఎక్కడి నుండి వచ్చింది, ఎవరు చేసారనే దానిపై దర్యాప్తు చేపట్టారు.
రెన్నెస్‌లో ఉంటున్న 23 ఏళ్ల విద్యార్థి ఆ కాల్ చేసినట్లు తెలుసుకుని అతడిని అదుపులోకి తీసుకున్నారు. తన తల్లిదండ్రులు తనను కలవడానికి ఆ విమానంలో బయలుదేరినట్లు, వారు రావడం ఇష్టం లేక ఆ బెదిరింపు కాల్ చేసానని అతడు తెలిపాడు. విచారణలో ఉన్న ఈ కేసు తేలితే అతనికి భారీ మొత్తంలో జరిమానాతో పాటుగా ఐదేళ్ల జైలు శిక్ష పడే అవకాశముంది. గోటితో పోయేదాన్ని గొడ్డలిదాకా తెచ్చుకోవడమంటే ఇదే మరి!!
