ఓ షాపింగ్ మాల్‌లో తండ్రి చేతుల నుంచి జారిపడిన ఓ పసికందు ప్రాణాలు కోల్పోయాడు. ఈ ఘటనలో తీవ్రంగా గాయపడిన ఆ పసికందును ఆస్పత్రికి తరలించినా ఫలితం దక్కలేదు. ఈ విషాదకర ఘటన ఛత్తీస్‌గఢ్ రాష్ట్రంలోని రాయ్‌పూర్‌లో జరిగింది. దీనికి సంబంధించిన వీడియో ఒకటి ఇపుడు సోషల్ మీడియాలో వైరల్ అయింది.
రాయ్‌పూర్‌లోని సిటీ సెంట్రల్ మాల్‌కు తమ ఇద్దరు పిల్లలతో కలిసి ఓ జంట షాపింగ్ కోసం వచ్చింది. భార్య షాపింగ్ చేస్తుండగా పిల్లలతో కలిసి భర్త బయట నిల్చొనివున్నాడు. పిల్లల్లో ఒకరికి ఐదేళ్లుకాగా, మరొకరు యేడాది వయసున్న పసికందు. ఇంతలో ఎస్కలేటర్ ఎక్కేందుకు పెద్ద కుమారుడు మారాం చేయడంతో, వద్దంటూ తండ్రి కట్టడి చేయడం కనిపించింది.
ఈ క్రమంలో భుజంపై ఉన్న చిన్న కుమారుడు జారి కిందపడ్డాడు. పై ఫ్లోర్ నుంచి కింద పడటంతో తీవ్రంగా గాయపడ్డాడు. ఆ వెంటనే సమీపంలోని ఆస్పత్రికి తరలించారు. అయితే, అప్పటికే బాబు చనిపోయినట్టు వైద్యులు నిర్ధారించారు. తన చేతుల్లో నుంచి కొడుకు జారి పడి ప్రాణాలు పోగొట్టుకోవడంతో ఆ తండ్రి కన్నీరుమున్నీరవుతున్నారు.
