ఈ పాట.. 1953లో తీసిన "బ్రతుకు తెరువు" అనే చిత్రంలోని ఈ పాట. అక్కినేని నాగేశ్వరరావు, అలనాటి నటి సావిత్రి నటించిన ఈ సినిమాలో 'అందమె ఆనందం' అనే పాట తెలుగు సీమను చాలాకాలం పాటు ఉర్రూతలూగించింది. అప్పట్లో కుర్రాళ్లు, పెద్దాళ్లు తరచుగా ఈ పాటనే పాడుకోవడం ఫ్యాషన్‌గా వుండేది. తెరువు అంటే తమిళంలో వీధి, సందు అనే అర్థాలున్నాయి.
మరో పదంతోను జతచేసి తెలుగువాళ్లు తెరువును ఉపయోగించరు, బతుకుతో తప్ప. ప్రపంచంలో చాలా వైరుధ్యాలు ఉన్నట్లే రాజీపడే మనుషులు, రాజీపడని మనుషులు అని మరో రెండు రకాల వాళ్లు వుంటారు. మనుషుల్లో రాజీ ధోరణి, నిజాలు దాచేసి అబద్ధాలతో జీవితం గడిపేసే వారి మనస్తత్వాన్ని ఆధారంగా చేసుకుని రూపొందించిన చిత్రమే - "బతుకు తెరువు".
ఈ చిత్రం తెలుగులో వచ్చాక హిందీలో "జీనేకి రాహ్‌" అనే పేరుతో ఇదే కథతో సినిమా తీశారు. అది చూసి మళ్లీ తెలుగులో "భార్యాబిడ్డలు" అనే తెలుగు చిత్రం ఇంకోటి వచ్చింది.
బతుకు తెరువు సినిమా వచ్చింది, నాకు బతుకు తెరువు నిచ్చింది అంటూ ఈ గీత రచయిత సముద్రాల జూనియర్‌ చెప్పుకునే వారట. ఆయన అసలు పేరు సముద్రాల రామానుజాచార్యులు. సముద్రాల సీనియర్‌ కుమారుడే ఈ జూనియర్‌ సముద్రాల. ఆయన రాసిన మొట్టమొదటి పాటే పాపులర్‌ అయింది.
ఈ పాటలో మరో విశేషం వుంది. ఇందులో ఇద్దరు ఇంగ్లీష్‌ కవుల ప్రఖ్యాతమైన కొటేషన్లు కనిపిస్తాయి. ఇంగ్లీష్‌ కవి కీట్స్‌ రాసిన పొయెట్రీలో ఒక వాక్యం. 'ఎ థింగ్‌ ఆఫ్‌ బ్యూటీ ఈజ్‌ ఎ జాయ్‌ ఫర్‌ ఎవర్‌' అనే మాటకు యథాతథంగా కాపీలా వుంటుందీ.. 'అందమె ఆనందం'. ఇదే పాటలో మరో చోట జీవితమే ఒక నాటక రంగం - అనే వాక్యం వుంది. అది షేక్స్‌పియర్‌ వాడిన మాట... 'ఆల్‌ ద వరల్డ్‌ ఈజ్‌ ఎ స్టేజ్‌' అనే మాటను గుర్తు చేస్తుంది.
బతుకు తెరువు సినిమాకి సంగీత దర్శకుడు జె.వి.రాఘవులు అయినా అందమె ఆనందం పాటకి ట్యూన్‌ ఇచ్చింది మాత్రం ఘంటసాల గారే అంటారు. ఆయన గళంలో ఈ పాట మధురాతి మధురంగా పలికింది. పి.లీల శ్రుతి కలిపారు.
