స్వస్తిక్ అదృష్టానికి చిహ్నంగా భావిస్తారు. ఈ గుర్తును హిందూ మతంతో పాటు బౌద్ధ, జైన మతాల ప్రజలు కూడా వినియోగిస్తారు. విదేశాల్లోనూ ఈ గుర్తుకు ప్రాశస్త్యం వుంది. సంస్కృతంలో స్వస్తిక్ అంటే సు-మంచి, అస్తి-కలగటం. మంచిని కలగించడం అని అర్థం. స్వస్తిక అంటే దిగ్విజయం. ''ఓంకారం'' తర్వాత అత్యంత ప్రాముఖ్యతను కలిగిన చిహ్నం స్వస్తిక. జీవన చక్రాన్ని స్వస్తిక సూచిస్తుంది.
స్వస్తిక్‌ను నాలుగు వేదాలు (రిగ్వేదం, యజుర్, సామ, అధర్వ)గా పేర్కొంటారు. వాటిని జీవితంలోని నాలుగు లక్ష్యాలుగా భావించవచ్చు: ధర్మం, అర్థ, కామ, మోక్షం. ఇంకా స్వస్తిక్ నాలుగు దిశలు, నాలుగు యుగాలను సూచిస్తుంది. ముఖ్యంగా దీపావళి రోజున లేకుంటే కార్తీక దీపం రోజున అలా కాకుంటే.. శనివారం రోజున స్వస్తిక్ గుర్తుతో రంగోలీ సిద్ధం చేసుకోవాలి.
రంగులద్దిన పొడులు, బియ్యం, ధాన్యాలతో స్వస్తిక్‌ను అలంకరించి.. దానిపై తమలపాకులను వుంచి ఆరు దీపాలను వెలిగించడం లేదా నాలుగు దీపాలను వెలిగించాలి. ఇలా చేయడం ద్వారా సకల శుభాలు చేకూరుతాయి. వ్యాపారాభివృద్ధి ప్రాప్తిస్తుంది. అనుకున్న కోరికలు నెరవేరుతాయని ఆధ్యాత్మిక పండితులు సూచిస్తున్నారు.
