సాహసకృత్యాల మేళవింపు "మొదలియార్‌కుప్పం"
నీటి ఉపరితలాన్ని చీల్చుకుని ముందుకు దూసుకెళ్తుండే పడవలు సందర్శకులకు ఓ వింత అనుభూతిని పంచిపెడుతున్న ప్రాంతమే "మొదలియార్‌కుప్పం". చిన్న బోటుకు కట్టిన తాడు సహాయంతో సుమారు రెండు వందల అడుగుల ఎత్తుకు రివ్వున ఆకాశంలోకి దూసుకెళ్లే "వాటర్ పారా సైలింగ్" జలక్రీడను ఇక్కడి ప్రత్యేకతగా చెప్పవచ్చు.చెన్నై, పాండిచ్చేరి ఈస్టుకోస్టు రోడ్డు, కాంచీపురం జిల్లా సరిహద్దు ప్రాంతంలో నెలవైన ఈ మొదలియార్‌కుప్పం "రెయిన్డ్రాప్ బోట్‌హౌస్" విదేశీ పర్యాటకులను సైతం విపరీతంగా ఆకట్టుకుంటోంది. మరింత ఎక్కువగా పర్యాటకులను ఆకర్షించేందుకు తమిళనాడు పర్యాటక శాఖ, ఒక ప్రైవేట్ సంస్థతో కలిసి సంయుక్తంగా సాహస జల క్రీడలకు శ్రీకారం చుట్టింది.ఈ రెయిన్డ్రాప్ బోట్‌హౌస్‌లో సందర్శకులను ఆకట్టుకునే పలురకాల సదుపాయాలు ఎన్నో ఉన్నాయి, ఇంకా పలు సదుపాయాలను కల్పించే పనిలో పర్యాటక శాఖ నిమగ్నమై ఉంది. ముందుగా పది పడవలతో ప్రారంభమైన ఈ బోట్‌హోస్‌లో ప్రస్తుతం గయాక్ పడవలు, రెండు వాటర్ స్కూటర్లు, అరటిపండు ఆకారంలోగల బోట్‌లు, గంటకు వంద కిలోమీటర్ల దూరం వేగంతో దూసుకెళ్లే బోట్లను సిద్ధం చేశారు.అంతేగాకుండా ఈ బోట్‌హోస్‌లో వాటర్ పారాసైలింగ్, వాటర్ స్కీ లాంటి సదుపాయాలను కూడా పర్యాటకశాఖ అందుబాటులోకి తెచ్చింది. చిన్న బోటుకు కట్టిన ఓ తాడు సాయంతో సుమారు 2 వందల అడుగుల ఎత్తుకు ఆకాశంలోకి దూసుకెళ్లటం పారాసైలింగ్ ప్రత్యేకత కాగా... నీళ్లపై బోటు కదిలే వేగానికి అనుగుణంగా సందర్శకులు ఆకాశంలో తేలుతూ ముందుకు దూసుకెళ్తుంటారు.అయితే ఈ పారాసైలింగ్ క్రీడకు పర్యాటకులు శిక్షకుడితో కలిసే ప్రయాణించాల్సి ఉంటుంది. కొత్తవారైతే ఒక్కరు, పారాసైలింగ్‌లో ఇదివరకే అనుభవం ఉన్నవారయితే ఇద్దరు ఒకేసారి ప్రయాణించవచ్చు. వాటర్ స్కీ కూడా బోటు సాయంతో ప్రయాణించేదే అయినప్పటికీ... సందర్శకుడు ఆకాశంలో కాకుండా, నీటి ఉపరితలంపై ప్రయాణిస్తుంటాడు.ఇది కూడా బోటు వెళ్లే వేగానికి అనుగుణంగా ఉంటుంది. ఇది నీటి ఉపరితలాన్ని చీల్చుకుని ముందుకు దూసుకెళ్తూ పర్యాటకులకు వింత అనుభూతులను పంచుతుంది. ఇదిలా ఉంటే... ఈ బోట్‌హౌస్‌లో జూలై నెల మొదటి వారంలో ప్రవేశ పారాసైలింగ్, వాటర్ స్కీ తదితర జలక్రీడలకు పర్యాటకుల నుంచి విశేష స్పందన కనిపించిందని పర్యాటకశాఖ ప్రకటించింది.ఇదిలా ఉంటే... మొదలియార్ కుప్పం బోట్‌హోస్‌లో త్వరలోనే మరిన్ని వసతులను కూడా ప్రవేశపెట్టనున్నట్లు పర్యాటకశాఖ వెల్లడించింది. సందర్శకుల్లో సాహసకృత్యాల పిపాసను తీర్చేవిధంగా "బంపింగ్ అండ్ జంపిగ్", వేడిగాలి సాయంతో గాలిలో ప్రయాణించే "హాట్ ఎయిర్ బెలూన్", "వాటర్ కైట్ ఫ్లయింగ్", నీటిలో మునిగి సముద్రం అంతర్భాగంలోని దృశ్యాలను తనివితీరా చూసేందుకు వీలుగా ఉండే "స్కూబా డైవింగ్' తదితర జలక్రీడలను ప్రవేశపెట్టేందుకు ఏర్పాట్లు చురుగ్గా సాగుతున్నట్లు ఆ శాఖ తెలియజేసింది.
